蘋果「iPhone 拍易收」（Tap to Pay on iPhone) 登陸香港！的士佬唔使買機，袋部 iPhone 就收到錢
Apple 公司今日宣佈，喺香港推出全新支付服務「iPhone 拍易收」(Tap to Pay on iPhone)！呢個突破性嘅功能預計會幫到好多靠跑數搵食嘅人，提供一個又慳錢又方便嘅新方法俾佢哋隨時隨地收客人錢，就係只需一部 iPhone，iPhone 11 打後都得，只要係拍卡俾錢就可以用 iPhone 作為收銀機。
解構「iPhone 拍易收」乜東西
呢個叫 Tap to Pay on iPhone 嘅技術，其實係 Apple 專登為咗各位老闆仔推出嘅新技術。佢係用 iPhone 本身內置嘅 NFC（近場通訊）功能，等啲舖頭仔唔使額外買或者租多舊 POS 電子收款機。只要係 iPhone 入面，裝好指定嘅收錢 App，部 iPhone 瞬間就變咗收款機！無論係信用卡、扣帳卡、Apple Pay 定係其他拍卡畀錢方式都照單全收。
流動收錢新著數
呢個服務擺到明係啱晒啲成日走嚟走去嘅生意佬，好似係的士司機、送貨嘅師傅、賣花嘅、或者搞快閃店嘅。最大嘅好處係幫佢哋真正做到降低營運成本，唔使畀錢買傳統嗰啲收錢機。收錢嗰陣仲更加靈活，喺戶外、街頭都可以輕易搞掂。支援嘅支付品牌好多，包括 Visa、Mastercard、銀聯、American Express、JCB 仲有 Apple Pay 呀咁。
香港開波有咩支援
截至 2025 年 12 月 9 日，Tap to Pay on iPhone 服務已經喺香港正式起動。而家打頭陣合作嘅支付平台就有 Adyen、Global Payments、KPay 與 SoéPay。首批受惠嘅行業包括上述嘅的士、外送、花店呀咁，總之係講求流動性嘅服務。想用嘅商戶只要 Download 呢啲 Payment 公司嘅支定 iOS App，搞掂埋 KYC 驗證，就可以開波收錢！
