HTC VIVE Eagle AI 智能眼鏡到港！Made in Taiwan 加用到 Google Gemini (免 VPN)
近年智能眼鏡愈出愈多，好多人都想買返副嚟玩下。HTC 旗下第一款 AI 智能眼鏡 VIVE Eagle 終於殺到嚟香港開賣，呢款標榜台灣設計及製造嘅眼鏡，其 VIVE AI 背後採用國際頂級 Google Gemini 作智能模組，講到明要做到科技同 Fashion 兼備。今日我哋就有機會實地試玩，由戴得舒唔舒服、AI 醒唔醒目，去到影相靚唔靚都試真啲，睇下呢款新機係咪真係睇得又戴得，定係虛有其表？呢支 HTC VIVE Eagle 又會唔會令 HTC Fans 由想像佢哋出手機，變為每年期待佢哋推出 AI 智能眼鏡呢？即刻同大家詳細拆解 。
外型夠潮戴得舒服
HTC VIVE Eagle 唔似一般科技產品咁笨重，主打型格路線，無論你點襯衫都無問題。佢一共有紅、黑、咖啡、灰四隻色，除咗黑色係實色之外，其他都玩半透明鏡框，望落相當有科技感 。成副眼鏡輕過 49 克，戴上眼其實同平時戴黑超無分別，戴全日都唔會覺得辛苦 。機身係 HTC 自己研發，專登就返亞洲人嘅面型去整鼻墊同鏡腳，鏡腳尾仲特登避開電子零件，方便你去眼鏡舖調較鬆緊，真係夠細心 。鏡片仲用埋 ZEISS 太陽鏡片，有 UV400 防護，出街擋太陽又清又安全 。
聽歌通話都好得
講到聽歌，VIVE Eagle 用咗開放式設計，左右兩邊都有大單元同虛擬重低音技術 。即場試過，啲聲好立體，低音亦都夠力，睇片聽歌都好爽 。因為唔洗塞住個耳仔，耳道無咁大壓力，喺街行路或者搭車都可以聽到周圍環境聲，安全感大增 。講電話方面，佢有多麥克風同降噪演算法，就算喺好嘈嘅記者會現場，講嘢收音都好清 。最正係佢識得喺適當時候整細啲漏音，咁就唔怕比隔離聽到你講咩秘密，私隱度高好多 。
AI 幫手同即時翻譯
VIVE Eagle 有個 1200 萬像素嘅超廣角鏡頭，想影相拍片，撳個掣或者用口講就搞掂，仲識自動幫你修正水平，畫面夠穩陣 。AI 方面，HTC VIVE 用咗類似 Perplexity 嘅安排，係佢哋 VIVE AI 語音助理背後用 Google Gemini 技術，唔係直接連入 Gemini，所以香港使用都唔洗連上 VPN。台灣還可以揀 OpenAI ChatGPT，但香港版則唔會有呢個選項。VIVE AI 語音助理支援中文 (國語) 及英文。HTC 表示，2026 年 2 月會升級支援廣東話，而廣東語音由 HTC 自行研發。此外，HTV VIVE Eagle 入面嘅語音助理，都可以直接連動 Apple iPhone 入面嘅 Siri，或者 Android 手機入面嘅 Google Assistant，可以做到幫你校鬧鐘、查天氣 。去旅行最驚雞同鴨講，佢有個「即拍即譯」功能，對住個餐牌或者路牌影相，佢就會讀個翻譯出嚟，繁體中文、日文、韓文都對應到，配合佢去外遊就最好不過。
電量夠用私隱有保障
電量方面，內置 235mAh 電池，官方話待機頂到 30 至 36 個鐘，連續聽歌就有 4.5 到 5 個鐘，基本上出街玩一日都夠用 。充電用磁吸線，啪一聲就吸住，充 10 分鐘就充到 50%，仲可以邊充邊用 。私隱方面 HTC 都好著緊，資料會加密同去識別化，唔會攞去訓練 AI 。鏡框上面有粒 LED 燈 ，一影相錄影就會著，遮住佢或者戴得唔好，個系統就會自動停用拍攝功能，咁就唔洗怕比人誤會你偷拍啦 。
發售資訊
VIVE Eagle 於 12 月 11 日 正式開賣，建議售價為港幣 3,988 元，共推出紅、咖、灰、黑四款配色，包括太陽眼鏡及抗藍光透明鏡片款式，從戶外風格到都會穿搭皆能自然融入。凡購買VIVE Eagle將獲得價值港幣600元的 24 個月的「VIVE AI Plus」服務，隨盒附贈 VIVE Eagle 眼鏡盒。配合 1O1O、csl、SmarTone 5G 服務計劃，即可用專案優惠價格入手 VIVE Eagle，另有溥儀港幣 500 元配鏡優惠券。
