首推品牌 eSIM 儲值月卡! csl 數據月卡限時特價 $68 有 4G 全速數據　識玩仲可以養卡足八年

csl 最近靜靜雞出咗第一款 eSIM 本地儲值卡，價錢由 $98 減到 $68，雖然低調但就相當有趣。呢張卡唔單止可以 MNP 攜號轉台，仲用緊 csl 4G 全速數據兼支援 VoLTE 及 VoWiFi 話音技術，最正係佢有個超低成本嘅「養號碼」方法，只要用得啱，張卡可以用足八年半。俗語話邊度有咁大隻蛤乸隨街跳，但今次 csl 呢張卡似乎真係做到大件夾抵食。

4G 全速上網　連 VoWiFi 都用得

呢張儲值卡，名為 csl 數據月卡，本身係 OK 便利店，以 $98 售價開實卡。但最近 csl 網店減價 $30，即 $68，以 eSIM 方開賣！講到功能，呢張 eSIM 絕對唔失禮。佢用返 csl 4G 網絡，聲稱 4G 全速數據任衝，係未進入公平使用量限制前係無限速，比起坊間不少 4G 數據卡，寫明限速 42Mbps，感覺會好一啲。

另外佢仲支援 VoLTE 同 VoWiFi，屋企收得唔好都可以用 VoWiFi 打電話。最好嘅係，佢仲送 csl Wi-Fi 熱點任用，例如你去到一啲有 csl Wi-Fi 覆蓋嘅地方，好似 Starbuck Coffee Shop，你嘅手機照用 Mobile Data 上網，電腦就可以用 csl Wi-Fi 網絡，或者直接手機連 Wi-Fi，慳番唔少 Mobile Data。

收費

呢張 csl 收據月卡，開卡頭 30 日已經包咗 18GB 本地 4G 數據及 1000 分鐘本地通話，就算用爆咗 Data，都仲有 512kbps 無限限速數據畀你用，真係幾佛心。此外，加陣 csl 做緊推廣優惠，每月免費送系統「來電過濾功能」幫你係系統層面，打擊垃圾來電。

數據組合豐儉由人　小數怕長計

頭 30 日用完之後點算？大家可以按需要買 Data Plan。譬如 $128 就有 30 日 80GB 數據，或者 $58 有 30 日 20GB 全速數據連無限通，$88 就有 30 日 40GB 數據。其實計落條數，呢張儲值卡比起 csl 自己嘅上台 4G 月費計劃抵玩啲，同樣嘅 Data 量，價錢隨時平一半。小數怕長計，對於唔想簽約又想用靚網嘅朋友嚟講，呢個絕對係精明之選。呢張卡仲未援 MNP 帶 Number 轉台，不過，留意嘅係，要先買新 Number，再係佢哋嘅 Web 或者 App 介面，再申請帶號碼台，同埋你將月費計劃，變為儲值卡，都要接受頭半年，打出電話，對方會聽到「此電話由儲值卡打出」嘅防止詐騙電話提示。

漫遊通話抵玩　一張卡最長免費續命八年

漫遊方面佢都照顧周到，支援內地、澳門同多國漫遊。最受歡迎，應該係亞太地區 24 小時通行證，$15 一日 500MB 之後 512kbps 無限上網，或者 $78 包七日，可非連續使用嘅 Day Pass 。最精彩嘅係佢有個「養號碼」秘技：只要買個 $6 嘅中國及澳門 100MB 用量漫遊 Data Pass，張卡嘅有效期就可以延長 365 日。因為開卡送 $48 儲值額，只要你呢 $48 只用嚟買 $6 pass，你用呢筆錢夠你續期 8 年，加埋本身個有效期，畀 $68 就可以養個號碼成 8.5 年，真係抵到爛。