隧道上網慢到嘔？由大欖隧道開始 5G 測速，呢個台真係「有料到」

日日搭車經過隧道，最怕就係上網「龜速」甚至斷線，真係等到蚊瞓。尤其係住大西北嘅朋友，對大欖隧道嘅網絡應該都好有感，不過係彈多過讚嗰隻，有啲台，甚至得 3G 網絡！自從政府喺 2025 年收返大欖隧道之後，聽講裏面嘅網絡世界已經唔同晒。今次我哋帶咗 3 香港 SIM 卡同手機，入去測速，試埋東區海底隧道，同埋大老山隧道，睇吓隧道網絡呢個戰場，今時今日係點。

大欖隧道大翻身

以前講起大欖隧道，網絡差幾乎係常識，有啲台連 4G 都收唔到，真係慘過返印度。但自從 5 月底政府收返條隧道之後，遊戲規則就唔同晒。以前「大細超」嘅情況冇咗，個個台都可以入場砌過。就好似3 香港，唔單止即刻開返 4G同5G，最近仲靜靜雞升埋 5G「黃金頻譜」。我哋揸住張 3 香港 SIM 卡入去行一轉，測到下載有 186Mbps，呢個速度，堅係「黃金頻譜」先做得到！

咩叫「黃金頻譜」？

網絡商成日話自己有 5G，但係咪堅嘢，就要睇佢有冇用「黃金頻譜」。你當佢係上網嘅「大容量高速公路」，唔止夠快，仲可以好多人一齊用都唔會塞車。我哋用手機嘅 Engineering Mode 睇到，3 香港喺大欖隧道開盡咗 3500MHz 同 3300MHz 頻段，即係就算繁忙時間成村人喺巴士上面睇片打機，都唔怕上唔到網。最好笑係，之前話自己好威威，入面有 5G 嗰個台，到而家都仲未搞掂個「黃金頻譜」，真係「得個樣」！

隧道網絡邊個係大佬？

除咗鬥港鐵，原來行車隧道先係兵家必爭之地。最近 3 香港就出嚟「認叻」，話全香港 23 條行車隧道，由大欖到愉景灣，佢哋都係獨家做到全 5G 覆蓋。佢哋仲畀咗份比較圖我哋睇，截至 8 月 1 號，佢哋喺隧道嘅「黃金頻譜」覆蓋係最多嘅。我哋自己去東隧同大老山隧道試，速度一樣咁快，睇嚟 3 香港今次真係落足彈藥，唔係齋吹水。