iPhone Duo 預訂大塞車排到出年 1 月 供應短缺反或帶動 iPhone 18 Pro 銷情
Apple 旗下首部摺疊式手機 iPhone Duo 喺剛過去嘅星期五正式展開預訂，但整個預購過程出現嚴重供不應求，出貨日期喺短短幾分鐘之內大幅推遲至明年 1 月底。外媒分析指出，Apple 喺明知產能受限嘅情況下，依然選擇喺全球超過 70 個市場同步開賣，做法形同重大決策失誤。不過，缺貨情況亦可能產生連鎖效應，令部分買唔到摺機嘅用家轉向選購傳統嘅 iPhone 18 Pro 系列。
開賣數分鐘即大塞車 預計送貨期推遲逾三個月
根據 Bloomberg 專欄記者 Mark Gurman 報道，今次預訂過程相當混亂。Apple Store 應用程式喺原定太平洋時間清晨 5 點開售後，延遲咗數分鐘先正式開放接收訂單。然而去到大約 5 點 02 分，近乎所有機型配置嘅預計送貨時間已經推遲到 11 月初，即係用家需要等到 10 月 23 日正式發售日之後一星期先可以收到新機。
隨後訂單等候期進一步失控，由 11 月中、11 月底、12 月，一路向後推遲至翌年 1 月底。即係話，只要用家稍為遲咗幾分鐘落單，就要面臨長達三個月以上嘅漫長等待期。對於一向以強大供應鏈管理自居嘅 Apple 嚟講，新 iPhone 出現長達三個月嘅等候期相當罕見。以一部定價超過 2,000 美元嘅旗艦產品計算，如果用家要等到 1 月底先收到貨，屆時距離傳聞中嘅下一代產品 iPhone Duo 2 推出時間，亦只係相差大約四分之三左右。
產能受限仍強推全球開賣 被批決策失誤
報道分析指出，Apple 今次喺策略上犯下咗明顯失誤。品牌事前經已清楚掌握生產端存在嚴重供應限制，但依然堅持如期推進發售，背後動機好可能係為咗爭取將新機納入財政年度第一季度（Q1）嘅業績入面，而非以滿足市場實際需求為先。呢個做法直接打擊咗最渴望第一時間入手嘅早期支持者。雪上加霜嘅係，Apple 至今依然未有披露正式發售當日，零售門市究竟會有幾多現貨供應，甚至連現場會唔會有現貨提供畀冇預訂嘅用家，都完全未有交代。
事實上，Apple 原先曾有其他選擇。品牌最初計劃只喺美國同中國兩個主要市場率先推出 iPhone Duo，其後先逐步擴展到其他地區。然而 Apple 最終改變策略，一開始就喺超過 70 個國家及地區同步開售，將本身經已非常有限嘅貨源分散到更多市場。若果 Apple 當初維持原有方案，主力市場嘅用家本來會有更高機會成功買到新機。Apple 喺明知產能不足嘅情況下依然強行推行全球發售，反映出市場規劃上出現咗嚴重失誤。
摺機缺貨或成契機 轉向推動 iPhone 18 Pro 買氣
雖然 iPhone Duo 嘅供貨安排令市場失望，但報道亦指出情況對 Apple 整體銷情可能存在潛在推動作用。Apple 內部評估認為，iPhone Duo 嘅極度缺貨，好可能會刺激 iPhone 18 Pro 同 iPhone 18 Pro Max 嘅銷量。
市場預期會出現兩批轉移客群：第一批係親身前往門市打算購買 iPhone Duo 但撲空嘅用家，因為唔想空手而回而直接改買 iPhone 18 Pro 系列；另一批用家則係受到摺機話題同宣傳吸引而走入 Apple Store 睇機，但喺實機體驗後，最終選擇以大約一半嘅價錢，轉買傳統設計嘅 Pro 系列型號。對 Apple 嚟講，只要顧客最終願意購買新 iPhone 離開門市，就能夠保住一定銷售額。
雖然 iPhone Duo 缺貨可能意外為 iPhone 18 Pro 系列帶嚟銷售轉機，但依然難以掩蓋今次摺機發售策略上嘅混亂。Apple 喺明知生產挑戰極大嘅前題下，依然選擇喺全球大規模鋪貨，結果令願意付出超過 2,000 美元購買第一代全新形態產品嘅忠實用家大失所望，亦對品牌長年累積嘅供應鏈管理聲譽帶嚟考驗。
