免費，可能更貴！Perplexity 改試用條款！經 HKT、csl 申請嘅朋友被要求加回信用卡資料
AI 界嘅「搜尋神器」 Perplexity 最近有大動作，佢哋更新咗全球用戶嘅試用條款。呢次改動對於當初經 csl、1O1O、Club Sim 或者 HKT 香港電訊攞咗一年 Pro 試用嘅香港用家影響好大，分分鐘原本以為係免費餐，點知而家要睇住張單。如果唔想個 Pro 戶口突然失效，唔想被人收多咗錢，就要留意以下嘅變動。
試用都要登記信用卡 唔跟有乜嘢問題？
Perplexity 今次針對全球更改條款，要求所有試用緊嘅戶口都要登記返有效嘅信用卡資料。以前大家經電訊商領取試用碼，都唔使填支付資料就玩得，但呢種蜜月期已經完咗。
如果你係受影響用戶，而又唔去補返資料，Perplexity 就會唔客氣將你個帳號由 Pro 降級做 Free 版，立即變番「免費仔」。到時你想用唔同嘅 AI Model 去搵資料或者分析文件，就真係「諗都唔使諗」，只能夠用返最基本嘅功能。
對香港用家有乜嘢打擊？
透過 HKT 集團，包括網上行 Netvigator，csl、1O1O、Club Sim 攞一年 Pro 免費使用優惠嘅用家，而家面臨緊幾個實際問題：
- 一定要交「信用卡或 Debit 卡冧巴」：即使你只係想玩完嗰一年就走，而家都要先交出信用卡資料。
- 試用完自動扣錢：條款寫明試用期一過，系統就會自動當你續訂，喺你張信用卡扣錢。
- 服務中斷風險：如果你唔理佢封通知，過咗期限之後，你原本有嘅 Pro 權限就會消失。
有乜應對方法?
若想繼續用埋剩返嗰幾個月嘅 Pro 服務，最實際嘅做法係：
- 先登記，後管理：乖乖地上 Perplexity 登記返張卡先，確保 Pro 身份無事。
- 設提醒，防扣錢：最好喺手機 Set 個鬧鐘提醒自己，喺一年之約到期前幾日，去 Account Setting 度取消自動續訂（Auto-renewal），咁就唔驚會被扣冤枉錢。
FAQ
Q1：點解之前唔使入卡，而家突然要入返？
答：因為 Perplexity 更新咗全球試用條款，要求所有用家都要登記有效支付資料嚟驗證戶口，同埋為試用期後嘅續訂做準備。
Q2：入咗信用卡資料會唔會即刻扣錢？
答：唔會。如果你仲喺一年免費試用期內，系統只係紀錄資料。但記得，一旦試用期完咗，佢就會自動喺你張卡度扣錢續訂。
Q3：我入咗資料之後，可唔可以即刻取消訂閱？
答：可以。你入完卡保住個 Pro 資格之後，隨時都可以去設定度取消「自動續訂」。咁樣你就可以玩埋剩低嘅免費日子，又唔驚到期會被扣錢。
Q4：如果我唔理佢，唔去登記張卡，會點樣？
答：你個帳號會被自動降級去「標準版」，失去所有 Pro 功能，包括每日多次 Pro Search、上傳檔案分析同埋自選最強 AI Model嘅權限。
Q5：我有問題應該搵邊個幫手？
答：你可以 check 返 Perplexity 出畀你嘅 Email 通知，或者親臨 1O1O Center / csl AI Store，亦可以致電熱線 28872202 查詢。
