手機品牌鬼故：OnePlus 手機被傳即將停產？母公司 Oppo 被指已啟動關閉程序
最近有報導話，OnePlus 手機品牌可能要同大家講 Bye Bye，佢哋嘅母公司 Oppo 好似已經開始逐步收埋呢個品牌。雖然官方仲未出面講，但好多跡象都顯示，OnePlus 喺全球嘅業務已經跌到谷底。
江湖鬼故
嚟自 Android Headlines 有一段偏向 Old News 嘅「獨家報導」話，OnePlus 嘅營運已經大受打擊。Oppo 正喺度收縮品牌，好多產品開發計劃都已經凍咗，例如原定推出嘅 OnePlus Open 2 折疊機同 OnePlus 15s 縮小版旗艦機。另外，OnePlus 喺全球嘅團隊都大規模裁員，特別係北美、歐盟同埋亞洲地區，而家啲地區策略都由中國總部直接控制。
市場表現急劇下跌
根據 Omdia 跟 IDC 提供嘅數據，OnePlus 喺 2024 年嘅出貨量跌咗超過 20%，由大約 1700 萬部跌到 1300 至 1400 萬部之間。佢哋喺印度同埋中國市場表現尤其差：印度有 4,500 間零售店因為利潤太低而停咗賣 OnePlus 手機，而中國市場嘅市佔率由 2% 跌到 1.6%，未達成 3% 嘅年度目標。
公司內部動向同員工證言
Android Headlines 引述咗來自三大洲嘅員工話，OnePlus 嘅總部已經關咗，同供應商嘅合約都已經終止。好多產品開發計劃都取消咗，地區辦公室只留低少數人，而且冇獨立決策權。
官方迴應同後續發展
到而家為止，OnePlus 都仲未發出正式聲明。不過，佢哋印度分公司話「營運如常」，又指相關報導「未經查證」、「係唔實嘅資訊」。OnePlus 印度總經理 Robin Liu 喺 X 平台發文話：「我哋而家照常運作，會繼續咁樣。」雖然咁樣，但 Android Authority 同 XDA 都話未收到 OnePlus 嘅正式回應，呢個新聞會繼續追蹤。
而家仲未有官方公告話 OnePlus 會全面停產，留意嘅係，呢條「獨家鬼故」，睇番原著，講嘅事，都不是新鮮事，唔係乜嘢新數據，有啲數據是以年計，感覺就係拼拼湊湊，再推論 OnePlus 會玩完。不過，呢個世界，好多傳聞嘅嘢，傳傳下會成真，OnePlus 係咪要摺埋，未來發展，就要睇母公司 Oppo 嘅最後決定啦。
