免 VPN！免費仔都用到！Grok 推 4.1 版本！主打高 EQ 減少「老作」
俗語有話士別三日，刮目相看，Elon Musk 嗰壇 xAI 喺 2025 年 11 月 17 日正式發布嘅最新 AI 版本 Grok 4.1 正正就係最佳例子。今次升級唔單止係數字上嘅遊戲，更加係內在修為嘅大提升。官方講明今次重點係整走以前啲毛病，務求令 AI 變得更聰明、更貼心，畀大家一種全新嘅體驗。
實牙實齒少出錯 善解人意更貼心
以前玩 AI 最怕佢一本正經咁胡說八道，但 Grok 4.1 今次邁向實牙實齒。根據測試，新版產生「幻覺」即係亂噏嘅機率大幅跌咗 3 倍，由之前 12% 減到得返 4% 左右，喺 FActScore 測試表現非常醒神，係 xAI 目前為止最少出錯嘅模型。
除咗更老實，Grok 4.1 嘅 EQ 亦都升咗呢。佢喺 EQ-Bench 3 攞到 1586 分，比起上一代可以話係大躍進。而家佢更加識得聽人話，理解到你嘅語氣同情緒，回應起上嚟自然好多，亦都更有同理心。無論係傾偈定係搞創意，佢都唔會好似機械人咁硬邦邦。
寫作如有神助 速度快人一步
講到寫嘢，Grok 4.1 更加係如虎添翼。喺 Creative Writing v3 測試入面，佢攞到 1722 Elo，比上一代多咗成 600 分。寫出嚟嘅嘢風格統一，節奏又好，最緊要係少咗好多行貨味。速度方面佢亦都係快人一步。用戶實測都話感覺顯著快咗，喺盲測入面，有接近六成半嘅時間用戶都覺得 Grok 4.1 嘅回應正過舊版。佢仲分咗兩個模式，想深思熟慮解決複雜問題就用「Thinking」模式；想吹水傾偈求快就用「非 Thinking」模式。結果佢喺 LMArena Text Arena 總榜排第一，真係叻嘅。
Elon Musk 嘅 xAI 旗下嘅 Grok，係香港少數唔洗 VPN，免費仔都無乜限制嘅美式 AI 工具，即日可以去 Grok.com 網頁版，或者 iOS 或 Android 版嘅嘅 Grok App 用到。簡單一個 Gmail 就登記到架啦。
