告別每日叉電！HUAWEI WATCH GT 6 Pro ＋GT 6 ：21日續航 + 專業運動模式，運動愛好者必睇
HUAWEI 最近就發佈咗佢哋全新嘅 HUAWEI WATCH GT 6 系列。今次個系列嘅理念叫 Ride the Wind 馭風而行，就係想帶畀我哋一種自由自在、輕鬆舒服嘅健康生活方式。今次仲請嚟方力生出席發佈會，有佢加持，成個 GT 6 系列都有活力好多。
一門兩傑
今次個系列主要有兩款，一款係高階型號 HUAWEI WATCH GT 6 Pro，係 46mm 嘅。另一款就係 HUAWEI WATCH GT 6，有 41mm 同 46mm 兩個尺寸揀。到智能手錶，大家最關心嘅一定係電量問題啦，成日要叉電真係好煩。HUAWEI 今次就針對呢個痛點做咗個大突破，其中 46mm 嘅型號，續航力竟然可以去到成 21 日咁耐！ 你無聽錯，係 21 日！叉一次電，就夠你完成一個完整嘅訓練週期，幫你養成運動嘅好習慣，真係徹底告別電量焦慮。 而細啲嘅 41mm 版本，續航力都唔弱，有成 14 日。點解可以咁長氣？原來 HUAWEI 今次用咗隻叫高矽疊片定製電池，令到電池密度提升咗 37%，容量仲要大咗 65%，技術上真係落足功夫。
高階版 GT 6 Pro
HUAWEI WATCH GT 6 Pro 嘅設計好有心思，46mm 錶身用咗流線型立式計時錶圈，個斜面邊緣令到成隻錶睇落好有層次感。佢哋仲收窄咗個邊框，令個螢幕大咗 5.5%，個視覺體驗就更加震撼啦。用料方面都好講究，有藍寶石玻璃錶面、航天級鈦合金錶身，同埋納米晶陶瓷後殼，又襟用又 high-end。
普通版 GT 6
至於普通版嘅 WATCH GT 6，46mm 型號嘅設計靈感嚟自單車運動，個三色漸變錶圈好有活力感。而 41mm 版本就有個好特別嘅可動式環形錶耳設計，戴上手會更加貼合手腕，襯衫就更加容易。HUAWEI WATCH GT 6 Pro 全系列都係用 AMOLED 螢幕，峰值亮度高達 3000 nits，就算喺太陽底下都睇得好清楚。 而且隻錶仲有 IP69 防護等級，防水防腐蝕，非常襟用。
運動向功能
功能方面，今次 HUAWEI WATCH GT 6 系列特別 focus 喺幾樣香港人好鍾意嘅戶外運動，好似單車、跑步、高爾夫球同滑雪。最犀利嘅係，佢係第一隻搭載單車騎行虛擬功率計嘅 HUAWEI 智能手錶。佢會結合你嘅身型、單車參數、實時運動數據同埋環境資料，去計返一個模擬功率出嚟，個準確度聽講可以媲美專業嘅功率計，咁你就可以更加科學咁去調整你嘅訓練強度啦。如果你係跑手，佢新升級嘅 HUAWEI 向日葵定位系統，定位精準度提升咗 20%，仲有埋海拔趨勢圖、實時坡度分析呢啲進階功能，幫你喺比賽時更好咁分配體能。健康管理方面都升咗級，新嘅 HUAWEI TruSense 玄璣感知系統，可以做到多維度嘅情緒同心血管健康監測，仲提升咗跌倒檢測同埋睡眠、情緒檢測嘅準確度，全面咁照顧你嘅身心健康。
21日養成挑戰
為咗推廣今次隻新錶，HUAWEI 仲搞咗個叫「21日養成挑戰」嘅活動，搵嚟方力申、楊文蔚、歐鎧淳同曹星如呢幾位星級運動員同藝人，親身戴住隻錶去完成各種運動目標，喺 social media 分享佢哋嘅訓練過程。
售價資料
HUAWEI WATCH GT 6 Pro 賣價由港幣 $2,499 起，最貴嘅鈦金屬錶帶版就係 $3,499。
HUAWEI WATCH GT 6 46mm 版本就由 $1,699 起。而 41mm 版本都係由 $1,699 起，最貴嘅米蘭尼斯錶帶版就係 $2,299。 而家買仲有好多嘢送，包括 HUAWEI Band 10 智能手環、額外一條錶帶、三個月 HUAWEI Health+ 會員，仲有 HUAWEI 智能體脂磅，不過個體脂磅就要自己去客戶服務中心換領，送完即止㗎。詳情睇下面圖片。
