DJI Osmo Nano 登場！Youtuber 必入貨？磁吸穿戴相機仔 隨時隨地話咁易拍靚片
DJI Osmo 家族又多個新成員！ｊDJI 推出全新嘅自由視角穿戴相機 Osmo Nano 。呢部機仔主打超輕巧同磁吸設計，真係細細粒，容易食用，無論你係踩緊單車、同寵物玩定係去 party，都可以解放雙手盡情拍。究竟佢有幾犀利？我哋一齊睇下。
磁吸設計夠靈活 點裝都得
Osmo Nano 最煞食嘅地方就係佢個雙面磁吸設計，夠晒靈活，你想吸喺邊都得 。官方仲出咗好多配件，好似磁力帽夾、磁力掛繩同頭帶，可以將部機夾喺帽、掛喺心口或者戴上頭 。咁樣就算你煮緊飯、做緊手作或者同貓貓狗狗玩，都可以專心做自己嘢，部機就幫你拍低晒啲精彩時刻，雙手唔使再揸機，方便到極 。
畫質唔嘢少 4K 慢動作樣樣齊
咪睇 Osmo Nano 機仔細細，佢嘅影像實力絕對唔可以睇少。內置 1/1.3 吋感光元件，拍到 4K/60fps 影片，仲有 4K/120fps 慢動作，畫質非常清晰 。個鏡頭有 143° 超廣角，影景影人都無難度 。就算喺好暗嘅地方都唔使驚，佢有超級夜景模式，加上 10-bit & D-Log M 色彩，出嚟嘅畫面顏色又靚又細緻，專業感十足 。
長氣又傳得快 Osmo 生態圈完美配合
講到電量，主相機用到 90 分鐘，加埋個多功能影像傳輸模組仲可以去到 200 分鐘，夠晒你玩足一日 。叉電又快，20 分鐘就叉到 80% 。過片方面，插線最高有 600MB/s，用 Wi-Fi 6 無線傳輸都有 80MB/s，過片落手機快到飛起 。佢仲可以直接連兩個 DJI Mic 收音，錄音質素都照顧周到 。
賣幾錢
Osmo Nano 標準套裝（64GB）售價 $2219 ，內含 Osmo Nano 主相機（64GB）、Osmo Nano 多功能影像傳輸模組、磁力帽夾、磁力掛繩、保護殼、雙向磁力球頭組件等配件。Osmo Nano 標準套裝（128GB）售價 $ 2559有 Osmo Nano 主相機（128GB）、Osmo Nano 多功能影像傳輸模組、磁力帽夾、磁力掛繩、保護殼、雙向磁力球頭組件等配件。
