Samsung 九月香港新品懶人包：AI 打孖上！Galaxy Tab S11 Series ! 仲有入們 Tab S10 Lite + Bud3 FE 耳機
Samsung 喺 9 月一口氣曬冷咁多新產品，仲要部部都大玩 AI，真係花多眼亂。不過唔使驚，呢篇文章就同大家集中火力，介紹一下香港有得賣嘅幾件重頭戲，睇下今次 Samsung 又有咩新板斧。
主角登場：旗艦平板 Galaxy Tab S11 系列
今次嘅風頭躉，一定係 Galaxy Tab S11 系列啦！一部係有成 14.6 吋巨芒嘅 Galaxy Tab S11 Ultra，大過部最好賣嘅 13 吋 MacBook Air，真係唔講得笑；另一部就係的骰啲嘅 11 吋 Galaxy Tab S11。兩部機個心臟都換咗做聯發科天璣 9400+ 呢粒旗艦級處理器，效能快到飛起，專門就係為咗玩 AI。
部 S11 Ultra 真係做到鬼火咁薄，得 5.1mm 厚，又輕咗，拎上手完全唔費力。個芒仲要加咗防反光塗層，就算喺太陽底下都睇得清清楚楚。而 11 吋 S11 就啱晒我呢啲成日要拎出街嘅人，大細啱啱好，「進可攻，退可守」。兩部機身都用咗強化鋁合金，又有 IP68 防水防塵，帶出街用都唔使就住就住。
生產力 Level Up：新 S Pen 同強化版 DeX
講到 Tab S，點可以唔提支 S Pen？今年支新 S Pen 變咗六角形筆身，揸上手似足平時用開嘅鉛筆，寫嘢畫公仔都就手啲。筆上面多咗粒掣，喺 Samsung Notes 凌空撳一撳，就可以即刻叫個 menu 出嚟轉筆或者用 AI 功能，夠晒快靚正。
另外，個 Samsung DeX 都脫胎換骨，而家可以喺一部平板上面開足 4 個唔同嘅 desktop，好似多咗幾部電腦咁，做嘢 multitask 都唔會手忙腳亂。不過呢個新功能暫時係 Tab S11 系列獨家，舊機用戶就要等等等等喇。
入門都有誠意：Tab S10 Lite 同 Buds3 FE
唔係個個都要攻頂嘅，Samsung 今次終於記得班入門用家，出咗部 Tab S10 Lite。佢有 10.9 吋 90Hz 靚芒，跟機有 S Pen，仲有埋 Circle to Search 呢啲 AI 功能。最屈機係，一部入門機竟然有 7 年系統升級保證，真係用到你換機都仲有得 update！
同場加映仲有對平價耳機 Galaxy Buds3 FE。個樣夠潮，又有 ANC 降噪，聽歌睇戲包你投入感十足。最過癮係佢支援 Galaxy AI 即時翻譯，第時去旅行雞同鴨講？No way！戴住隻耳機，對方講咩都即刻譯返廣東話你聽，溝通無難度！
售價資訊
