入門 5G 機大比拼：HMD Crest 5G、Samsung Galaxy A16 5G、Redmi 13C 邊部最抵玩？

依家入門 5G 手機都打得好癲，各大品牌都出齊晒平靚正選擇。今次就幫大家比較 HMD Crest 5G、Samsung Galaxy A16 5G 同 Redmi 13C 5G，睇下價錢、設計、相機、電量同容量邊部最啱用。

價錢先行：HMD 平到笑，Redmi 最均衡

價錢對香港人嚟講係最實際嘅考慮，三部機之中 HMD Crest 5G 賣 HK$1,198；Redmi 13C 5G 只係貴少少 HK$1,399，但規格好啲；Samsung Galaxy A16 5G 就最貴，最平嗰版本，要HK$1,598。講價錢，HMD 真係超值，Samsung 就靠品牌同功能取勝，Redmi 就屬於中間路線。

外型睇真啲：HMD 最重手，Redmi 最輕身

三部機都係塑膠機身，冇乜花臣，實用至上：HMD Crest 5G：藍色款、204g，手感紮實；Samsung Galaxy A16 5G：多色選擇，淺灰、藍黑、金色都有，200g；Redmi 13C 5G：195g 最輕，簡約設計，啱晒唔鐘意複雜嘢嘅人。唔講唔知，HMD Crest 係最重，但都有質感。

相機點睇：Samsung 鏡頭最多，HMD 自拍勁

三機後置都係 5000 萬像素主鏡，但，Samsung Galaxy A16 5G：加埋 500 超廣角 + 200 萬景深，拍乜都得。HMD Crest 5G，前置居然 5000 萬像素，自拍一流；Redmi 13C 5G：有夜拍模式，但前置得 500 萬，夠基本用。如果你係自拍控，HMD Creast 5G 無得輸；鐘意玩構圖、影風景，就 Samsung Galaxy A16 5G 好啲。

電量拼過：三部都 5000mAh，HMD 充電最快

而家手機唔夠電真係好煩，三部都 5000mAh，都係大電池類型。但快充唔同：HMD Crest 5G，支援 33W，叉得最快；Samsung Galaxy A16 5G，支援 25W 快充，唔錯；Redmi 13C 5G，支援 18W 快充，最慢。要長時間出街又要快叉電，HMD Crest 5G 真係幾著數。

容量對決：Redmi RAM 最大，Samsung 擴展最犀利

Redmi 13C 5G，有 8GB RAM + 256GB，支援到 1TB 記憶卡，跑得最快。Samsung Galaxy A16 5G：最多支援到 1.5TB 記憶卡，拎嚟擺片擺歌都唔驚。HMD Crest 5G，有 128GB，MicrSD 記憶卡，擴展最多 256GB，算係入門中嘅入門。所以睇你重視速度定容量，Redmi 13C 5G 整體規格就幾夠晒用。