前 Nokia 手機生產商新 5G 手機 | HMD Fusion | 二千有找 | 介紹及賣點

今日想同大家介紹一部幾有趣嘅新手機，由前 Nokia 手機生產商 HMD 生產。呢部 HMD Fusion 最特別嘅地方，係用咗模組化智能手機呢個定位。呢部手機，最大嘅賣點就係可以更換背蓋，官方叫呢啲背蓋做「Fusion Outfits」。換咗背蓋之後，你部手機唔單止設計可以變，仲可以多咗唔同嘅功能，好特別，其他品牌手機都做唔到。

首先講講設計，HMD Fusion 用咗半透明嘅塑膠機身，望落去有種現代工業風嘅感覺。機背仲有金屬接點，用嚟接駁各種配件，真係幾有型。至於尺寸就係 164.15 x 75.5 x 8.32 毫米，重量為 202.5 克，攞喺手唔會太重。而且佢有 IP54 防塵防水等級，即係平時用嚟應付毛毛雨或者水濺，都係冇問題。

硬件方面，呢部手機用咗 6.56 吋嘅 IPS LCD 螢幕，解像度係 1612 x 720，仲支援 90 Hz 更新率，操作同睇片都好順暢。至於處理器方面，用咗 Qualcomm Snapdragon 4 Gen 2 晶片，雖然佢係 4 系處理器，但其實用咗 4　納米組裝技術，表現穩定同更加慳電，用嚟應付日常使用完全足夠。記憶體同儲存方面，香港推出嘅版本，係 8GB RAM + 256GB ROM 仲支援最高 1TB 嘅microSD 咭擴充。

相機配置簡單但實用，後置有 1.08 億像素主鏡頭配合 200萬像素景深鏡頭，前置鏡頭就係5000萬像素，但主鏡頭只支援電子防手震，係缺點之一，不過，因為鏡頭像素較大，用四合一像素組合，可以加強吸光效果，令夜晚拍攝更得心應手。講到電池，HMD Fusion 有 5000mAh ，支援 33 Walt 快速充電，其他配置包括側邊指紋辨識、3.5mm 耳機插、WiFi 6、藍牙 5.1 同埋 NFC，功能算係齊全。

重點係 Fusion Outfits 配件，H M D 打算係香港推出專為愛自拍人士而設的攝影補光環形燈 Flashy Outfit、遊戲發燒友必備的遊戲手掣，仲有支援無線充電嘅 IP68 級別防水防塵保護套。Flashy Outfit　配備內建環形燈，可以與前鏡頭同主鏡頭配合使用，而透過 H M D Fusion 嘅六個專用引腳供電，令你無需再擔心你配件電池容量。