有 Android 手機，可免費玩 Gemini Live
我一向用開 OpenAI，課金都係課俾佢。
因為 Pixel 9 出咗，睇番 MadebyGoogle 發佈會，原來 Gemini 升級功能，下放俾晒 Android 手機用。
我知，我知，香港用唔到。咁 ChatGPT 香港都用唔到，都有人用，好多人用，只要好用，有唔太煩 workaround 就有人用。
唔係晒用 VPN 用到好威威，重點係，你可以用，點樣有 workaround。你嘈 Google 都無用，政治問題，Google 唔重視香港? YT 比緊收入你架喎！
想試 Gemini Live (類似 ChatGPT Voice 咁嘅，玩聲) ，咁我申請 Gemini Advanced，反正有一個月 Free 試用。已有一個全新非香港的 Google 戶口，但一直無掛信用卡入去。申請 Gemini Advanced 佢要你入信用卡。我因為有俾開 ChatGPT 課金，用嗰張新加坡發行嘅 Crypto Debit Card 掛上去。得咗，開埋 VPN，咁用緊嘅 Galaxy S24 Ultra 就有得試 Gemini Advanced。開 VPN，用 Proton 免費版都得。
但 Gemini Live 仲未得。上 reddit 睇，似乎唔係人人都立即開通。又要等..
簡單嚟講，以前介紹 Pixel 手機嘅時候，最煩唔係佢係水貨。華為手機 Fans 都係買水貨架啦，不少行家都寫水貨。最煩係佢唔支援香港 SIM 卡嘅 VoLTE 同埋 5G 連線，又無理由教人 Root 機。呢一代 Pixel 打通 5G。而 AI 部份，係解決得到。新嘅 Pixel 9 Pro，佢送一年 Gemini Advanced 都可以喺開通到嘅話，其實吸引力又會大咗，真係關番我哋事多少少，雖然無行貨都係麻煩少少嘅。
