小米推出全新 6 款 AIOT 產品 小米 Watch S5 有爆點:支援 Google Wallet
小米今日除咗旗艦手機 18 Pro 系列之外,仲同場推出 6 款全新 AIoT 智能娛樂產品,涵蓋穿戴裝置、影音同智能家居,由手錶、耳機、喇叭、風扇燈到牙刷、水牙線機都有,售價由 HK$239 起。除咗 Sound INF 要等到 11 月 27 日之外,其餘 5 款今日已經開賣。
6 款新品售價及開賣日期一覽
| 產品 | 售價 | 開賣日期 |
| Xiaomi Watch S5 41mm | HK$1,499 起(陶瓷白 HK$1,699) | 11 月 18 日 |
| Xiaomi Clip | HK$899 | 11 月 18 日 |
| Xiaomi Sound INF | HK$1,399 | 11 月 27 日 |
| 米家風扇燈 36 吋 | HK$729 | 11 月 18 日 |
| 米家多向掃震電動牙刷 Pro | HK$499 | 11 月 18 日 |
| 米家水牙線機 2 便攜版 | HK$239 | 11 月 18 日 |
Xiaomi Watch S5 41mm:首度支援 Google Wallet
今次 6 款新品入面最有爆點一定係 Xiaomi Watch S5 41mm,事關佢係 S5 系列首款支援 Google Wallet 及 NFC 付款功能嘅型號,抬起手腕就畀得錢,唔使再拎電話出嚟。
手錶主打時尚奢雅工藝,錶身厚度只有 9.9mm,採用不銹鋼材質結合靈動錶耳設計,戴上手更加貼合手腕弧度。正面係 1.32 吋 AMOLED 圓形螢幕,配一體玻璃工藝,視覺通透,邊緣觸感圓潤。續航方面,常規使用下有長達 14 日,唔使日日叉電。系統運行 Xiaomi HyperOS,內置多款可互動嘅萌寵錶盤,仲支援超過 150 種運動模式、全面健康數據分析,以及女性健康關懷功能。
售價方面,極致黑同淡藍色賣 HK$1,499,陶瓷白就賣 HK$1,699,11 月 18 日起正式開賣。
Xiaomi Clip:開放式夾耳耳機
Xiaomi Clip 係一款開放式夾耳設計嘅無線耳機,單邊只重 5.5g,內部骨架用記憶合金材質,緊貼耳廓,戴得穩陣,就算劇烈運動都唔易甩。聲學方面,機身內置 11mm 動圈單元,攞到 Hi-Res Audio Wireless 無線高解析音訊認證,仲配備 4 咪及 AI 智能降噪,大幅削弱戶外風噪,講電話更加清晰。
機身支援 IP57 防水防塵,連埋充電盒可以提供長達 38 小時總續航。系統除咗深度融入 Xiaomi HyperOS 生態,仲原生支援 Apple Find My 尋找網絡,就算係 iPhone 用家都可以精準追蹤耳機位置。耳機有金、白、粉、黑 4 隻顏色,售價 HK$899,11 月 18 日起正式開賣。a
Xiaomi Sound INF:150W 戶外藍牙喇叭
Xiaomi Sound INF 主打戶外派對體驗,具備 150W 旗艦重低音輸出,配合低音增強技術,低音夠晒勁。喇叭支援最新 Auracast 無線連接技術,可以一鍵無線互聯多部喇叭,組成立體聲效,輕鬆擴大音樂覆蓋範圍。機身兩端加入 3D 幻彩燈光,會跟住音樂節奏即時變化,派對氣氛一流。
針對戶外多變環境,機身達到 IP68 最高等級防水防塵,沙灘派對或者露營遇水都唔怕。電量方面有 28 小時超長續航,仲支援 15W 反向充電,隨時變身流動電源幫手機應急叉電。售價 HK$1,399,11 月 27 日開賣,係 6 款新品入面最遲出街嗰款。
米家風扇燈 36 吋:照明加對流二合一
米家風扇燈 36 吋結合全光譜照明同氣流對流系統,燈具模擬自然日光光譜,可以高度還原物件真實色彩。氣流調節方面有自然微風模式,仲支援雙向運轉:夏天順轉吹送穩定涼風加強降溫,冬天逆轉抽風促進暖氣對流循環,一年四季都啱用。機身特設一鍵睡眠模式,會按作息自動協調風速同光線強度。
系統除咗支援米家 App 遙距設定,仲原生相容 Xiaomi Home、Alexa 及 Google Home 等多個智能家居生態,可以直接用語音指令控制開關同風速。售價 HK$729,11 月 18 日起正式開賣。
米家多向掃震電動牙刷 Pro:刷頭識得認牙面
米家多向掃震電動牙刷 Pro 搭載全新研發嘅多向掃震摩打,將立體擺幅同高頻震動結合,帶來專業級潔牙體驗。機身內建智能牙面識別技術,可以自動感應刷毛接觸嘅齒面角度,即時調整清潔策略。刷柄特別嵌入彩色智能螢幕,清潔覆蓋率、清潔評分同電量等數據一目了然。
針對日常用力過猛或者施力唔均嘅問題,機身支援雙向壓力提醒,即時監測刷牙力度,保護牙齦健康。機身提供深紫及香檳金兩款配色,售價 HK$499,11 月 18 日起正式開賣。
米家水牙線機 2 便攜版:最平 HK$239 入手
6 款新品入面最平就係米家水牙線機 2 便攜版,售價只係 HK$239。水牙線機採用廣角水柱技術,中央水柱精準清潔牙縫,旁邊嘅廣角水流就沿住牙齦線清潔,清潔覆蓋範圍比傳統水牙線技術多達 7 倍,每分鐘 1,700 次脈衝水流,可以去除高達 99% 牙菌斑,同時溫和呵護牙齦。
機身內置 200ml 伸縮水箱,收起之後得手機咁大細,方便帶出街;一次注水就夠完成全口清潔,唔使中途加水。機身提供 4 種清潔模式同 3 種噴嘴,適合唔同用家需要,充滿電可以用高達 100 日,仲內置噴嘴收納同附送收納袋。售價 HK$239,11 月 18 日起正式開賣。
延伸閱讀:
- Shure 推出 MV360 空間音訊麥克風 US$349 即插即用直出雙耳沉浸音效
- Google Play 公布香港 2026 年度最佳榜 威力導演奪最佳 App 明日方舟:終末地奪最佳遊戲
- 小米 18 Pro 系列香港開賣 18 Pro 及 Pro Max 最平九千有找即入手
來源:小米香港






