SmarTone 推 AI Connect 服務　主打香港免 VPN 直連全球頂尖 AI 工具

喺香港想用最 Hit 最頂尖嘅 AI 平台，好多時都要又揾 VPN 又要跨區，真係費盡心思先用到。本地電訊商 SmarTone 最近就搞搞新意思，首度推出一個專為香港用家而設嘅連接服務，標榜可以免 VPN 直連 ChatGPT 同 Google Gemini 等頂尖 AI 平台。等大家少一個要 Join VPN 嘅籍口，因為網絡限制而拒絕用最好的 AI 平台。

服務特點及收費

呢個 SmarTONE「AI Connect」服務最吸引人嘅地方，莫過於幫大家慳返搞 VPN 嘅時間與成本。服務可以直接幫你免 VPN 連接去 ChatGPT、Google Gemini、Claude 及 Sora 呢啲至 Hit 嘅 AI 平台，對於香港用家嚟講真係減少左麻煩。最正嘅係唔洗怕一著 VPN 影響其他上體驗。收費方面，呢個服務每月只係 28 蚊，平時喺香港用就可以隨時享受免 VPN 用 AI 工具嘅快感，服務會扣除本地數據。

如何操作

操作好簡單，客戶唔使再上網申請 VPN，去學點樣設定 VPN 或者更改地區。大家只需要入返 SmarTone CARE App 就可以開啟服務，一開咗之後，客戶就可以直接喺手機網頁免 VPN 玩到各大要 VPN 連線先用到 AI 工具，包括 OpenAI ChatGPT，Google Gemini 同埋 Anthropic 嘅 Claude。

限制

不過，大家都要留意返，目前只係支援網頁版，係唔可以用 App 㗎。另外，由於服務本身已經提供咗專屬嘅免 VPN 連線，如果你有用開其他第三方 VPN 或者 iPhone iCloud Private Relay，記得要息咗佢哋先，如果唔係就會撞咗驗證，反而用唔到。最後仲有一點，就係呢個服務只係畀主機用，如果你開咗 Tethering 分享網絡畀朋友，佢哋係無得享受呢種免 VPN 嘅便利㗎。