DJI 終於出手！Osmo 360 上市：8K 全景畫質配一寸 Sensor，無敵 360 影相加拍片

DJI 剛剛發佈嘅一部 8K 超旗艦畫質全景相機，佢個名叫 Osmo 360。一寸見乾坤，就係佢哋嘅宣傳口號。一吋，即係用咗一吋 sensor，靚鏡頭喎，係全景相機嚟講，好少見。香港有得賣，一齊睇下有幾勁。

１吋 Sensor 是賣點

其實自從 2019 年 DJI 推出 Osmo Action 系列運動相機之後，一直都好受全球嘅用家歡迎。好多人都期待 DJI 幾時會正式踩入全景相機呢個市場。而家，佢哋終於出手。今次呢部 DJI Osmo 360，就係要帶畀大家一個更輕巧、更方便、性能更強勁嘅全景拍攝體驗。首先講下佢最勁嘅地方，就係畫質。呢部 Osmo 360 內置咗一個專為全景相機設計嘅全新方形高動態感光元件。你可能會問，方形有咩咁特別？簡單嚟講，佢可以好有效咁利用晒成個傳統 1 吋 sensor 嘅影像範圍，利用率提升咗 25%。好處係，除咗畫質明顯靚咗之外，仲可以降低功耗，令到部機身可以做到好輕巧。部 Osmo 360 機身只係重 183 克，非常輕巧。就算佢塞咗兩粒 1 吋 sensor 嘅鏡頭模組入去，都仲可以咁輕，真係唔簡單。

8K 攝錄

講到畫質，就一定要提佢嘅 8K 全景影片。Osmo 360 係 DJI 第一部可以拍到原生 8K 全景片嘅相機，仲要係用 2.4 μm 嘅大像素，有成 13.5 級嘅高動態範圍。就算你喺夜晚嘅城市，或者日出日落呢啲光暗對比好大嘅場景，影出嚟嘅畫面都一樣咁清晰，光位暗位都分得好清楚。佢最高可以拍到 8K 50fps，如果你想拍啲慢動作，仲可以揀 4K 100fps，做到 4 倍慢放，將啲精彩瞬間拍得更加震撼。喺暗光環境下拍攝，佢一樣咁掂。因為佢個創新嘅方形 sensor 同埋 f/1.9 嘅大光圈，入光量多咗好多，就算喺好暗嘅地方，都可以影到好多細節。你仲可以開埋個全景超級夜景模式，夜晚幾靚都影得晒。色彩方面，Osmo 360 嘅所有影片規格都支援 10-bit 色深，可以記錄超過 10 億種顏色。如果你係專業玩家，仲可以用 D-Log M 模式，呢個模式可以保留更多畫面嘅光暗細節，畀你後期調色有更大嘅空間。影相方面都唔弱，佢可以影到 1.2 億像素，即係 16K 超高畫質嘅全景相片。啲細節清到不得了，畀你一種好似親身喺現場嘅感覺。

續航力方面，佢內置咗高性能嘅影像晶片同埋出色嘅散熱設計，用 8K 30fps 呢個超高規格，可以連續錄足 100 分鐘。如果用 6K 嚟拍，仲可以錄到 190 分鐘。就算天氣凍都唔怕，喺零下 20 度嘅環境，都仲可以錄超過一個半鐘。佢仲支援快充，叉 12 分鐘就有 50% 電，話咁快又可以再出去拍過。

大容量 storage

儲存方面都好方便，Osmo 360 內置 105GB 內置儲存空間，以後出街就唔使驚唔記得帶 microSD 卡。傳輸速度都好快，用 Wi-Fi 6.0 無線傳輸可以去到 90MB/s，用 USB 3.1 有線連接電腦更加可以快到 600MB/s，處理大量素材都好輕鬆。

支援 DJI 嘅生態系統

DJI 嘅生態系統一向都好強大，呢部 Osmo 360 都唔例外。佢用咗 Osmo 磁吸快拆設計，可以同 Osmo Action 系列嘅配件互通，仲有個 1/4″ 螺絲窿，可以接駁傳統嘅相機配件，慳返唔少錢。如果你配埋支自拍棍同可調節快拆轉接件，就可以好快咁喺全景自拍同單鏡頭 vlog 之間切換。收音方面，佢支援 OsmoAudio 雙麥克風直連。你可以直接連接兩隻 DJI Mic 2 發射器，唔需要接收器，就可以錄到好清嘅人聲。如果你同時開埋機身收音做 backup，仲可以錄埋環境聲，令到條片更加有現場感。