3 香港以 5.5G 網絡成功完成全港首個戶外 4K 直播音樂會
香港嘅 5.5G網絡又有突破應用！就喺 12 月 8 號，3 香港同香港中樂團攜手合作，喺西九文化區藝術公園舉行嘅「鼓動心弦 連結世界」音樂會，不但係 2024 香港鼓樂節嘅重頭戲，仲創下咗全港首個戶外 5.5G 直播音樂會嘅紀錄！
5.5G 網絡有咩咁勁？
大家都知 5G 已經夠快，但 5.5G 更勁，據報速度比普通 5G 快十倍，而且時延低到接近毫秒級，即係幾乎無延遲。對於直播 4K 畫質嚟講，呢啲技術絕對係關鍵。今次 3 香港嘅工程團隊喺戶外場地成功設置 5.5G 訊號，配合專用嘅路由器，帶嚟強大嘅頻寬輸出，實現咗 4K 60fps 超高清直播！即使現場人山人海，都無影響直播質素。
連結全球，將鼓聲傳遍世界
講返音樂會內容，香港中樂團喺台上同來自韓國、馬來西亞、日本、印度同新疆嘅鼓樂藝術家一齊表演，鼓聲震撼又有層次，氣氛超高漲。多得 5.5G 網絡嘅超高清直播技術，全球樂迷都可以即時喺串流平台欣賞呢場演出。真係完美展現香港嘅文化軟實力，亦將鼓樂呢種傳統藝術推廣到世界各地。
5.5G 嘅應用前景
其實呢次並唔係3 香港第一次用 5.5G 創新，早前佢哋已經搞過全港首個 5.5G 劇場，而今次再創首個戶外音樂會嘅紀錄，證明咗呢項技術喺唔同場合都可以發揮強大作用，無論係娛樂、直播甚至其他產業，都充滿無限可能。
